Garapen pertsonala eta familiarra bultzatzen duten zerbitzuak eskaintzen ditugu, eskubide-ikuspegian oinarrituta aukera-berdintasuna sustatzen dutenak. Gizarte- eta hezkuntza-arloko esku-hartze pertsonalizatua da haurren, nerabeen eta haien familien egoera hobetzea xede duten askotariko jardueren ardatza. Programa osagarrien bidez, gaitasunak garatzen eta gizartean parte hartzen eta eragina izaten laguntzen saiatzen gara.
Hainbat ekintza egiten ditugu, hala nola tailerrak eta jardunaldiak, eta sare eta plataforma sozialetan ere bagaude, gizarte-errealitateari, bidegabekeriei eta gizarte-ekimenei buruz hausnartzeko, sentsibilizatzeko eta salatzeko helburuarekin.
Giza Eskubideen aldeko borroka ere babesten dugu, herrialde pobretuetan haurrei eta gazteei laguntzeko proiektuetan kolaboratuz.
Haur eta nerabeen hazkuntza laguntzen dugu, hainbat heziketa-programaren eta familia-laguntzaren bidez. Urteko plan indibidualizatu batean oinarrituta, gizarte- eta hezkuntza-arloko esku-hartzea egiten da, bai maila pertsonalean, bai taldean. Ikasketa-programa lagunduetan agenda, denborak eta zereginak kudeatzen ikasten dute, esparru akademikoan hobetzeko helburuarekin.
Aisialdiko eta denbora libreko jarduera programatuak eta motibatzaileak egiten dituzte taldean, jolasaren bidez ondo pasatu eta ikasteko. Jarduerak astero antolatzen dira, eskola-ordutegitik kanpo, bai eta oporraldietan ere, hiri-udalekuetan.
Familien garapena eta ongizatea sustatzen duten heziketa-tailerretan parte hartzen dute. Tailer horien helburua prebentiboa eta gurasotasuna modu positiboan gauzatzea sustatzekoa da. Arreta psikoterapeutiko pertsonala eta familiarra ere eskaintzen da, familiaren barruan harreman-osasuna bultzatzeko
Elkartearen harrera zerbitzuaren helburua da gure zentroetara iristen diren pertsonak artatu, harreran hartu eta orientatzea.
Gizarte-langileen taldeak pertsonaren egoeraren diagnostiko integral bat gauzatzen du, eta erakundearen zentro, programa edo zerbitzuetan haren parte-hartzea bideratzen du.
Gainera, jarraipen sozio-administratiboa egiten dute, identifikazio-agiriak, osasun-txartelak, erroldatzeak, gizarte-laguntzak, doako justizia eta beste kudeaketa batzuk lortzen lagunduz eta horri buruzko informazioa eskainiz.
LAGUNTZAILEAK:
Besteak beste, “La Caixa” Gizarte Ekintzaren eta haren Caixa Proinfancia programaren laguntzarekin gauzatzen da Bilboko Haurren eta Familiaren proiektua. Programa horren helburua da gurasoek seme-alabei pobrezia transmititzeko zirkulua haustea, kalitatezko hezkuntza-aukerak bermatuta. Gizarte- eta hezkuntza-arloko esku-hartzea egiten da, haurrei, nerabeei eta haien familiei laguntza psikologikoa, aisialdia eta denbora librea emanez – Ikasturtean zehar eta udaleku urbanoak dituzten oporraldietan –, baita hainbat laguntza emanez ere.